<
<
<

توحشت بلادي

2 أبريل 2021 - 20:48
مشاركة

 

توحشت أحبابي وابلادي
حتى نزلت دموعي من عينيا

ماصبرني غير وجود أولادي
هوما لي بردوا نار الكية

راه الغربة حارة يا أسيادي
فرقتني مع ناسي لعزاز عليا

خلاتني ماشي هايم وغادي
نقول أنا مالي واش طاري بيا

كل يوم نار الشوق تزيد
ونتفكر ليام ودكرياتي تاهية

توحشت قبيلتي أولاد أحميد
من غيرها ولا مكان يحلى ليا

والله الغربة ما تخليك سعيد
ما تلقى لاناس ولا حد فيه مزية

سيدي سليمان ليها حب فريد
فيها كبرت وعشت المحبة الغالية

مع اصحابي وجيراني ما كنت وحيد
ديما مجموعين بالخير والنية

توحشت ديك اشجار الزيتون
لي شاهدة على فرحة قلبي الكبيرة

ومانسيت عراصي ديال الليمون
لو كان تتكلم على أسراري لكتيرة

راه على بلادي كلشي يهون
وديما عليها تجيني الغيرة

ما نسلم فيها مهما يكون
حيت راني عارف الدنيا قصيرة

والله ما نسيتكم يا أهلي وناسي
بغيت نكون ديما معاكم قريب

مانقدر نزيد في الغربة ونقاصي
قلبي ما يطاوعني راه الحال اصعيب

شحال من مرة يطير نعاسي
ونتفكر كل غالي عندي وكل حبيب

وبلادي الغالية راها تاج فوق راسي
هي غايتي ،وهي ليا أحسن طبيب

بقلم الشاعر والكاتب محمد لمليجي سفير السلام والناطق الرسمي باسم الجالية المغربية عبر العالم

تعليقات الزوار ( 0 )

اترك تعليقاً